ການນຳ ອວຕຊ ລົງເຄື່ອນໄຫວ ວຽກງານໃນຂົງເຂດ ວິທະຍາສາດ, ເຕັກໂນໂລຊີ, ຊັບສິນທາງປັນຍາ ມາດຕະຖານ ແລະ ວັດແທກ

ເຂົ້າສູ່ລະບົບ

ໃນລະຫວ່າງວັນທີ 10-19 ກຸມພາ 2010 ທີ່ຜ່ານມາ ທ່ານ ສ.ຈ. ດຣ. ບຸນຕຽມ ຜິດສະໄໝ ລັດຖະມົນຕີ ປະຈຳສຳນັກງານນາຍົກ ລັດຖະມົນຕີ, ຫົວໜ້າ ອົງການ ວິທະຍາສາດ ແລະ ເຕັກໂນໂລຊີ ແຫ່ງຊາດ (ອວຕຊ) ພ້ອມດ້ວຍ ຄະນະໄດ້ລົງເຄື່ອນໄຫວວຽກງານ ຢູ່ ແຂວງ ວຽງຈັນ ໃນຂົງເຂດວຽກງານ ວິທະຍາສາດ, ເຕັກໂນ ໂລຊີ, ຊັບສິນທາງປັນຍາ ມາດຕະຖານ ແລະ ວັດແທກ.

ເຊິ່ງ ການລົງເຄື່ອນໄຫວ ວຽກງານຄັ້ງນີ້ ແມ່ນໄດ້ເຂົ້າຮ່ວມ ກອງປະຊຸມ ວິຊາການ ດ້ານ ວິທະຍາສາດ ເຕັກໂນໂລຊີ ທີ່ຫ້ອງປະຊຸມ ແຂວງ ວຽງຈັນ ພາຍໃຕ້ການເປັນ ປະທານຮ່ວມຂອງ ທ່ານ ສ.ຈ ດຣ ບຸນຕຽມ ພິດສະໄໝ ລັດຖະມົນຕີ ປະຈຳ ສຳນັກງານນາຍຍົກ ລັດຖະມົນຕີ, ຫົວໜ້າ ອົງການ ວິທະຍາສາດ ແລະ ເຕັກໂນໂລຊີ ແຫ່ງຊາດ, ທ່ານ ວິດົງ ໄຊຍະສອນ ຄະນະ ພັກແຂວງ ຫົວໜ້າ ຫ້ອງວ່າການແຂວງ, ທ່ານ ນາງ ຄຳແຫວນ ອ່ອນປະດິດ ຫົວໜ້າພະແນກ ວິທະຍາສາດ ແລະ ເຕັກໂນໂລຊີແຂວງ ແລະ ມີຜູ້ເຂົ້າຮ່ວມທີ່ມາຈາກ ອວຕຊ, ແລະ ພະແນກການ, ເມືອງ ອ້ອມຂ້າງ ແຂວງເຂົ້າຮ່ວມຢ່າງ ພ້ອມພຽງ.

ກອງປະຊຸມຄັ້ງນີ້ ແມ່ນໄດ້ສະຫຼຸບຕີລາຄາ ການຈັດຕັ້ງປະຕິບັດ ແຜນການສົກປີ 2009 ແລະ ຜ່ານທິດທາງ ແຜນປະຕິບັດວຽກງານສົກປີ 2010 ຂອງ ພະແນກ ວິທະຍາສາດ ແລະ ເຕັກໂນໂລຊີ ແຂວງວຽງຈັນ. ໃນກອງປະຊຸມ ທາງການນຳຂອງ ອວຕຊ ຍັງໄດ້ ຍົກໃຫ້ເຫັນເຖິງຄວາມສຳຄັນ ຂົງໃນເຂດວຽກງານ ວິທະຍາສາດ ແລະ ເຕັກໂນໂລຊີ ເປັນຕົ້ນແມ່ນ ວຽກງານການ ນຳໃຊ້ ເຕັກໂນໂລຊີ Computer ຫຼື IT ເຂົ້າໃນການພັດທະນາ ເສດຖະກິດ-ສັງຄົມ ໃຫ້ທັນສະໄໝ ແລະ ກ້າວໜ້າ, ການແລກປ່ຽນຂໍ້ມູນຂ່າວສານທີ່ເຊື່ອມໂຍງເຂົ້າໃນລະບົບ E-government (ບໍລິຫານລັດແບບເອເລັກໂຕຼນິກ) ແລະ ລະບົບການອື່ນໆ, ວຽກງານຄົ້ນຄວ້າພະລັງງານທົດແທນຊຶ່ງຈະຊ່ວຍໃຫ້ປະຊາຊົນປະຢັດຄ່າໃຊ້ຈ່າຍ ແລະ ເປັນການຮັກສາສິ່ງແວດລ້ອມອີກດ້ວຍ, ວຽກງານສົ່ງເສີມການສຶກສາທາງດ້ານ ວິທະຍາສາດ ແລະ ເຕັກໂນໂລຊີ, ນອກນັ້ນ ໃນກອງປະຊຸມຍັງມີຄະນະນຳຂອງ ອວຕຊ ໄດ້ຜັດປ່ຽນກັນຂຶ້ນເຜີຍແຜ່ ຕາມແຕ່ລະໜ້າວຽກຂອງໃຜລາວເພື່ອ ເປັນການຖອດຖອນ ບົດຮຽນ ໃຫ້ແກ່ພະແນກ ແລະ ບັນດາເມືອງຕ່າງໆທີ່ເຂົ້າຮ່ວມ ແລະ ໃຫ້ເຂົ້າໃຈແຈ້ງກ່ຽວກັບບັນຫາດັ່ງກ່າວ ແລະ ນຳເອົາໄປຜັນຂະຫຍາຍ ເພື່ອປະກອບສ່ວນເຂົ້າໃນການສ້າງສາ ພັດທະນາປະເທດຊາດ ໃຫ້ດີຂຶ້ນເລື້ອຍໆ.

ວຽກງານຊັບສິນທາງປັນຍາ ມາດຕະຖານ ແລະ ວັດແທກເພື່ອສົ່ງເສີມ ຫົວຄິດປະດິດສ້າງ, ການປະດິດຄິດແຕ່ງ, ເສດຖະກິດ, ພູມປັນຍາ, ການຄຸ້ມຄອງ ແລະ ປົກປ້ອງສິດທາງດ້ານຊັບສິນທາງປັນຍາເພື່ອຮັບປະກັນຜົນປະໂຫຍດຂອງເຈົ້າຂອງຜົນງານ, ສົ່ງເສີມການຄ້າ, ການລົງທືນ ແລະ ຄວາມອາດສາມາດແຂ່ງຂັນ ໃຫ້ແກ່ເສດຖະກິດແຫ່ງຊາດ ໃນຍຸກໂລກາພິວັດ ຢ່າງມີປະສິດທິພາບ ແນໃສ່ປະກອບສ່ວນເຂົ້າໃນການຫັນປະເທດເປັນອຸດສາຫະກຳ ແລະ ທັນສະໄໝ.